الاعلام السوداني ايام ثورة سبتمبر

تلفزيون للبيع 

حنبيع التلفزيون....

و محلو نجيب الفيس...

شايلينو محل ما نمشي..

وعلينا حملو خفيف...

و نوفر كهربا برضو..

ونجيب بقروشا رغيف...

ونحافظ على صحتنا..

والضغط العالي يقيف..

نهجر اعلامنا الأعمى 

البيرقص حين نزيف...

و نشوفا حقيقي الثورة...

من غير غش وتزييف...

وين التخريب القالوا..

دي سلمية بدون تحريف...

شفنا الأبطال في الشارع..

ملّوهوا الوعدالزيف..

وشهيدنا الضحى بدمو..

شان باكر نقوى نقيف...

بي صورة فيس شفناهو...

ده القالوا عليو مافيش!!

وفي الفيس كانت نفرتنا..

وكتين مامطرنا خريف...

بي ضغطة بتنشر فكرة..

وتطنش كلّ سخيف..

فيسك اعلامك إنت..

نقيه بيبقى نظيف..

عبّر عنك واسمعنا..

والكلمة أكيد بتضيف..

وأنا برضو الليلة مصرّة..

حأبيع التلفزيون..

اعلامنا ف وادي ونحن..

في وادي هناك بنقيف!!!

                                                                     كلمات ايمان الطيب